Isa 58 | NdeIBE | STEP | “Memeza kakhulu, ungathuli. Phakamisa ilizwi lakho njengecilongo. Tshela abantu bami ngokuhlamuka kwabo, lendlu kaJakhobe uyitshele ngezono zabo.

Isaiah 58

Ukuzila Okuqotho

1 “Memeza kakhulu, ungathuli. Phakamisa ilizwi lakho njengecilongo. Tshela abantu bami ngokuhlamuka kwabo, lendlu kaJakhobe uyitshele ngezono zabo.

2 Ngoba usuku ngosuku bayangidinga; bafuna ukwazi izindlela zami, angathi bayisizwe esenza okulungileyo esingalahlanga imilayo kaNkulunkulu waso. Bacela izinqumo ezilungileyo kimi bafune ukuthi uNkulunkulu asondele kubo.

3 Bathi, ‘Kungani sizilile, kodwa wena kawakubona na? Kungani sizithobile kawakunaka na?’ “Ikanti ngosuku lokuzila kwenu lenza elikuthandayo, licindezele lezisebenzi zenu zonke.

4 Ukuzila kwenu kucina ngengxabano lokulwa, langokutshayana kubi ngenqindi. Alingeke lizile njengelikwenzayo lamhla lithembe ukuthi ilizwi lenu lizazwakala phezulu.

5 Lokhu yikho ukuzila engikukhethileyo na, ukuthi umuntu azithobe okosuku olulodwa nje? Yikuthi umuntu akhothamise ikhanda lakhe njengomhlanga nje, lokulala esakeni lemlotheni na? Lokho yikho elithi yikuzila, usuku olwamukelekayo kuJehova na?

6 “Lokhu akusikho yini ukuzila engikukhethileyo: ukukhulula izibopho zokungalungi lokuthukulula imichilo yejogwe, kukhululwe abacindezelweyo, kwephulwe amajogwe wonke na?

7 Akusikwabela abalambayo ukudla kwakho lokunika umnyanga ongumhambuma indawo yokuhlala – lapho ubona abanqunu ubagqokise, lokungafulatheli izihlobo zakho zegazi na?

8 Lapho-ke ukukhanya kwakho kuzavela njengokusa, lokusila kwakho kuzabonakala masinyane, kuthi ukulunga kwakho kuhambe phambi kwakho, inkazimulo kaJehova izakuba yisivikelo ngemuva kwakho.

9 Lapho-ke uzabiza, uJehova asabele; uzacela usizo, yena uzakuthi: Ngilapha. “Ungalahla ijogwe lokucindezela lokukhomba ngomunwe kanye lezinkulumo ezihlinikezayo;

10 njalo uma unika abalambayo ukudla kwakho, wanelise leziswelo zabacindezelweyo, ukukhanya kwakho kuzavela emnyameni, ubusuku bakho buzakuba njengemini.

11 UJehova uzakukhokhela kokuphela; uzakwanelisa iziswelo zakho elizweni elitshiswa lilanga, aqinise amathambo akho. Uzakuba njengesivande esithelezelwa kuhle, lanjengomthombo olamanzi angacitshiyo.

12 Abantu bakho bazawavusa amanxiwa amadala, bavuse lezisekelo zakudala. Uzabizwa ngokuthi uMvusi Wemiduli Eyadilikayo. UMbuyiseli Wemigwaqo elaMakhaya.

13 “Uma ugcina izinyawo zakho zingephuli iSabatha, njalo ungenzi intando yakho ngosuku lwami olungcwele, uma iSabatha ulibiza ngokuthi yintokozo njalo usuku lukaJehova olungcwele usithi lulodumo, njalo uma uluhlonipha ngokungahambi ngendlela yakho, langokungenzi intando yakho loba ukukhuluma amazwi ayize,

14 lapho-ke uzathola intokozo eNkosini, njalo ngizakukhweza emiqolweni yelizwe, ngikwenze udle ilifa likayihlo uJakhobe.” Umlomo kaJehova usukhulumile.